BLANCAMENT VÒSTRAS

VOLEM AVER LO DRECH…

d’estre vièlhas e reconnegudas coma talas !

de blanquinejar del pièu, de negrejar de la mostacha, de la rasar o de la daissar possar, coma nos agrada !

de frostir de la pèl, d’engraissar de la talha e del cuol o al contrari de secar de davant coma de darrièr, caduna a son biais !

de tremolar de la votz e de la man, de caminar dapassonet dins las savatas, de perdre quauquas dents, de ganhar de l’èime e del caracteri !

de reire e de plorar a volontat !

de recèbre lo bonjorn e los portaments, de donar las novèlas !

de cultivar lo bonur e l’amor dins totas las circonstancias de la vida e quitament facia a la mòrtn tè, justament volem aver lo drech de ne’n parlar !
… de la mòrt e de la vida a nòstre biais !
Lo drech de n’en parlar e d’estre entendudas !

Lo drech de viure, nom de nom, tant que i serem, i serem !

Dusc’a la fin e pas a meitat !

BLANCAMENT VÒSTRAS

Aquò’s atal que s’apèla una còla de vièlhas coifadas, mascadas e emmascairas…
Ni a que son doças e parpandas, maitas un pauc romegairas; ni a que son bruèissas autenticas, adobairas e erbacièiras.
Cal pas creire !

Aquela còla e passeja per las carrièras, dins las assembladas, pels festenals de tota mena.
Pòt prener lo tren, lo carri, l’avion o lo ferri !..Çò que li agrada es d’anar ont i a de mond que se pòt saludar, trobar, paupejar, potonejar, parlar, estonar, mocar…
Aquel biais de far saberut l’a trapat a la pratica correnta de las insolentariàs de Carnaval que s’esfòrça de tornar imaginar.

Podes les convidar per un çaganh de nuech o de campestre; segur que te farà rire o que sauprà escarvilhar tas emocions.
I menara lo tust e la dança.
Li pòdes comptar !

Les avetz vistas en la carrièras de
Tolosa, Montpelhièr, Rodès, Pesenàs, Murat, Agde, Carcassona, Nimes e dins una molonada de vilatges occitans !..
atal coma en Girona (Catalonha) o Santa Eugenia (Mallorca).